Ali nyang Sadikin

Bang, aye kaget denger berite Abang ude kagak ade. Aye shock, bang!
Biarpun aye bukan warga Jakarte, tapi aye perne tinggal di Jakarte biar cuma setaon. Waktu entu nyang jadi gebernur juge bukan Abang lagi. Tapi peninggalan Abang selame sebelas taon jadi gubernur aye ikutan ngerasain.

Aye paling seneng same TIM, Bang. Banyak senimannye, ye? IKJ entu sekole tingginye seniman ye, Bang?

Abang pegi pas kite-kite lagi memperingatin seratus taon Kebangkitan Nasional.
Angke seratus kalo dibagi due pan jadi lime puluh, kayak waktu Abang bikin petisi same temen-temen Abang nyang peduli same bangse. Abang berani, ye?

Abang ude perne jadi Angkatan Laut. Letjen purnawirawan ye, Bang? Ude jadi menteri laut waktu kabinetnye cepek menteri.

Juge ude perne jadi Gubernur nyang paling hebring. Sebelas taon, gitcu loh! Jakarte kagak ade ape-apenye kalo bukan karene Abang. Padalan Soekarno milih Abang jadi gubernur karene Abang koppig, bahase kumpeninye.
Sekarang Jakarte banjir mulu, Bang. Demo ampir tiap ari, ngalahin tabloid mingguan aje. Sampah... duille, bingung mau dikemanain.

Nyang namenye Bappeda, nyang ngerencanain pembangunan daerah, entu pan ide-nye Abang. Coba kalo bukan karene inisisatip Abang taon 1968 dulu, mane ade nyang ngerencanain daerah mau dibangun kayak ape? Nyang istile tertib pemerintahan bise jadi juge karene Abang orangnye.

Abang ude dapet Bintang Mahaputera Adipradana untuk jase-jase Abang bangun Jakarte. Jadi orang pertame yang ngedapetin Anugerah Cipta Utama karene jase Abang buat kesenian. Abang juga digelar guru bangse taon due rebu lime kemaren.

Nih kalo aye bole ngomong jujur, pas repotnasi dulu aye nyalonin Abang jadi Presiden. Sumpe!

Aye sedih bener, Bang. Tapi aye pecaye Tuhan pasti sayang same Abang. Rume Abang di sorga pasti gede, ye Bang? Doa aye buat Abang. Barengin salam aye buat Mpok Nani....


Farewell, our great leader!

(in memoriam: Ali Sadikin. 7 Juli 1927 - 20 Mei 2008)